کابل (پژواک، ۳۱ زمری ۱۴۰۰) : مخکني ولسمشر کرزي، ډاکټر عبدالله او زاخېلوال کابل کې د هېواد د راتلونکې او د داسې چاپیریال پر ایجاد خبرې کړي چې په هغه کې ټول خلک د راحت احساس ولري.
د افغانستان د نجات حرکت مشر داکټر عمر زاخېلوال نن پر خپلې فیسبوک پاڼې لیکلي چې کابل کې یې له پخواني ولسمشر حامد کرزي او د مخکني حکومت د مصالحې عالي شورا له مشر ډاکټر عبدالله عبدالله سره لیدلي دي.
هغه لیکلي چې دوی په دغه کتنه کې د هېواد د راتلونکي او د داسې چاپیریال پر ایجاد خبرې کړي چې په هغه کې ټول هېوادوال، ښځې او نارینه، د پوره راحت احساس ولري.
د زاخېلوال په وینا، په یاده لیدنه کې یې توافق کړی چې دوی به هدفمندانه ګډ کار کوي او په ګډه د افغانستان راتلونکي ته هیله مند دي.
دا په داسې حال کې ده چې طالبانو شپږ ورځي مخکې کابل ونیو. دا مهال له پنجشېر پرته ټول ولایتونه د طالبانو په واک کې دي.
د طالبانو مرستیال ملا عبدالغني برادر وړمه ورځ له یوه لوړپوړي پلاوي سره کابل ته راغلی او هېواد کې د یوه ټولشموله سیاسي نظام جوړلو لپاره په سلا مشورو بوخت دی.
Visits: 7
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن