کابل (پژواک، ۱۵ مرغومی۱۴۰۰): یوې پاکستانۍ رسنۍ خبر ورکړی چې دغه هېواد په افغانستان کې د دوه ميليارده پاکستانیو کلدارو په ارزښت طبي وسایل نصب او رغوي.
د پاکستان اکسپرس تربیون ورځپاڼې خبر ورکړی چې د پاکستان د انجنیرانو او نورو تخنیکي کارکوونکو یوه ډله افغانستان ته راغلې، تر څو دلته د دوه ميليارده پاکستانیو کلدارو په ارزښت طبي وسایل نصب او ورغوي.
سرچینه زیاتوي چې دغې ډلې تر اوسه په کابل، لوګر او ننګرهار ولایتونو کې د درېیو روغتونونو د تجهیزاتو د بيا رغونې او نصب چارې بشپړې کړې دي.
هڅه مو وکړه چې په دې اړه د افغانستان د عامې روغتیا وزارت هم معلومات راکړي، خو ځواب مو تر لاسه نه کړ.
د اکسپریس تریبیون ورځپاڼې د معلوماتو پر بنسټ، ټاکل شوې د درملو جوړولو د برخې ځينې پاکستاني پانګوال افغانستان ته سفر وکړي او په دغه هېواد کې د درملو جوړولو په برخه کې مرسته او پانګونه وکړي.
دغه راز د سرچینې د معلوماتو له مخې، پاکستان د افغانستان لپاره د ۵۰۰ میلیون کلدارو په لګښت د درملو چمتو کولو اعلان هم کړی و.
Visits: 585
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن