<p style="text-align: justify;">جلالاباد (پژواک، ۱۰ غويی ۱۴۰۲): د ننګرهار په مرکز جلالاباد ښار کې د يوه کس له خوا د ۷ ميليون ډالرو په لګښت د عصري او ديني زدهکړو يو کمپلکس جوړېږي.</p>
<p style="text-align: justify;">د معلوماتو له مخې، په دغه مرکز کې به ښوونځی، مدرسه، پوهنتون او د زدهکوونکو اوسېدو لپاره په عصري بڼه جوړه شوې ليليه هم موجوده وي.</p>
<p style="text-align: justify;">د محمديه اسلاميه دارالعلوم په نوم دغه علمي کمپلکس به د پنځو کلونو په موده کې جوړ شي چې په سيمه کې به يې ساری نه وي.</p>
<p style="text-align: justify;">د یاد کمپلکس ودانيزو چارو مسوول سمیعالله حقاني پژواک اژانس ته وويل، د يوه افغان پانګهوال له لوري د اووه ميلیون ډالرو په لګښت د محمديه اسلاميه دارالعلوم جوړولو چارې پيل شوې دي.</p>
<p style="text-align: justify;">هغه وايي، په دغه کمپلکس کې به د ښوونځي، مدرسې او پوهنتون زدهکوونکو او محصلینو ته د زدهکړو زمینه برابره شي.</p>
<p style="text-align: justify;">دی وايي، دغه کمپلکس د يو افغان پانګهوال له خوا د ملي سوداګرو او شتمنو وګړو په مالي ملاتړ جوړېږي چې نږدې څلور زره زدهکوونکي او محصلان به په کې په وړیا ډول زدهکړې کوي.</p>
<p style="text-align: justify;">نوموړي زياته کړه: «د سیمې په کچه یو ستر ښوونیز مرکز دی او د وخت له تېرېدو سره، انشاالله د اسیا په کچه به یو ستر ښوونیز مرکز وي.»</p>
<p style="text-align: justify;">د علمي کمپلکس د تعليمي پروګرامونو مسوول حسن جان حقاني وايي، د دغه مرکز جوړولو موخه په خپل هېواد کې پر يو ځای د عصري او ديني زدهکړو اسانتياوو برابرول او د ښوونځي او مدرسې ترمنځ د واټن ختمول دي.</p>
<p style="text-align: justify;">دی زياتوي: «له دغه مرکزه فارغېدونکی هر ډاکټر به حافظ د قران وي او هر مولوي به په عصري زدهکړو سمبال وي.»</p>
<p style="text-align: justify;">د مسوولينو په وینا، دغه مرکز د جلالاباد ښار په شپږمه ناحيه کې پر ۳۰ جريب ځمکه جوړېږي چې لس ودانۍ لري او رغنيزي چارې به يې د پنځو کلونو په موده کې بشپړې شي.</p>
<p style="text-align: justify;">د هغوی په خبره، دغه کمپلکس کې نږدې ۶۰۰ کسانو ته د کار زمينه برابرېږي.</p>
<p style="text-align: justify;">همدارنګه د جلالاباد ښار يوه اوسېدونکي وليالله پژواک ته وويل، د دغه مرکز په جوړېدو سره به هیڅ ننګرهاری اړ نه شي چې د ديني او عصري زدهکړو لپاره بهر ته لاړ شي.</p>
<p style="text-align: justify;">هغه له حکومته وغوښتل چې د دغه علمي مرکز د رسمياتو برخې ته هم پاملرنه وکړي څو د فارغېدونکي شخص اسناد په ادارو کې د منلو وړ وي.</p>
<p style="text-align: justify;">د ننګرهار د اطلاعاتو او کلتور رييس قاري نورمحمد حنيف وايي، دغه علمي مرکز به لکه د نورو خصوصي علمي مرکزونو رسميت ولري او د پوهنې او لوړو زدهکړو وزارتونو له خوا به يې فارغانو ته قانوني اسناد ورکول کېږي.</p>
<p style="text-align: justify;">دی زياتوي، دغه مرکز ته د حکومت د ملاتړ څرګندولو په موخه سر له اوسه برېښنا ورکړل شوې او که نورو برخو کې هم مرستې ته اړتيا ولري، همکاري به ورسره وشي.</p>
<p style="text-align: justify;">د یاد مرکز جوړوونکي هيلهمن دي چې د مرکز جوړولو چارو کې به يې بډای هېوادوال لاسنيوی وکړي.</p>
