کابل (پژواک، ۲۴ جوزا ۱۴۰۴): ټاکل شوې وه سبا د ایران او امریکا ترمنځ د اټومي پروګرام په اړه د غیرمستقیمو خبرو اترو شپږم پړاو د عمان هېواد په کوربهتوب ترسره شي، خو د ایران د بهرنیو چارو وزارت ویاند اعلان کړی چې د مقابل لوري د وروستي اقداماتو له امله دغه مذاکرات بېمعنا شوي دي.
له دې مخکې، د ایران بهرنیو چارو وزارت اعلان کړی و چې له امریکا سره به یې د غیرمستقیمو مذاکراتو شپږم پړاو د یکشنبې په ورځ (سبا) د عمان په پلازمېنه مسقط ښار کې ترسره شي.
د یادو مذاکراتو پنځه مخکني پړاوونه هم د عمان په منځګړیتوب ترسره شوي وو چې درې پړاوه یې په مسقط او دوه نور د اېټالیا په روم ښار کې ترسره شوي دي.
د تسنیم اژانس د راپور له مخې، د ایران د بهرنیو چارو وزارت ویاند اسماعیل بقايي ویلي چې «صهیونیستي رژیم» په خپل جنایت د ایران له ټولو سرو کرښو تېر شو او داسې کار یې وکړ چې مذاکرات بېمعنا شول.
نوموړي زیاته کړه، د ایران تمه دا ده څو ټول هغه هېوادونه چې اندېښمن دي، یاد جنایت وغندي.
د هغه په وینا، د ملګرو ملتونو امنیت شورا څرګنده دنده لري او پر ایران د اسرائیل برید باید په جدي توګه وڅېړل شي او لازم اقدامات ترسره شي.
هغه څرګنده کړې: «نه شي کېدای هممهاله د مذاکرې ادعا وکړئ او هممهاله کار ووېشئ او اجازه ورکړئ د نسلوژنې رژیم د ایران ټوله خاوره په نښه کړي.»
بقايي څرګنده کړې: «د چا لپاره د تصور وړ نه ده چې د اسرائیل رژیم د امریکا له اجازې پرته د داسې جنایت مرتکب شوی وي.»
اسرائیل د تېرې ورځې له سهاره د ایران پر څو مهمو ښارونو بریدونه کړي چې له امله یې اټومي او نظامي تاسیسات او دغهراز د دغه هېواد یو شمېر لوړپوړي نظامي چارواکي په نښه شوي دي.
یادو بریدونو ته په ځواب کې ایران هم د اسرائیل پر ځینو سیمو خپل بریدونه پيل کړي دي.
GET IN TOUCH
NEWSLETTER
SUGGEST A STORY
PAJHWOK MOBILE APP