<p style="text-align: justify;">کابل (پژواک، ۶ وږی ۱۴۰۴): د کډوالو په چارو کې د ملګرو ملتونو سازمان عالي کمېشنري وايي، په روان میلادي کال کې له پاکستان او ایران څخه ۳/۲ میلیون افغانان خپل هېواد ستانه شوي او بېړني ملاتړ ته اړتیا لري.</p>
<p style="text-align: justify;">د کډوالو په چارو کې د ملګرو ملتونو عالي کمېشنرۍ نن (پنجشنبه) په یوه راپور کې لیکلي چې له ګاونډیو هېوادونو لسګونه زره افغان کډوال خپل هېواد ته ستنېدو ته اړ شوي دي.</p>
<p style="text-align: justify;">یاد سازمان څرګنده کړې: «روان کال کې له پاکستان او ایرانه څه باندې ۳/۲ میلیون افغان کډوال خپل هېواد ته ستانه شوي؛ موږ د دوی بنسټیزو اړتیاوو پوره کولو لپاره د بېړنۍ مرستې غوښتونکي یو.»</p>
<p style="text-align: justify;">یاد سازمان زیاته کړې، د کډوالو پراخه راستنېدنه انساني ناروین رامنځته کوي او د کډوالو په چارو کې د ملګرو ملتونو کمېشنري د ژغورونکې مرستې ترسره کولو لپاره بېړني ملاتړ ته اړتیا لري.</p>
<p style="text-align: justify;">د کډوالو په چارو کې د ملګرو ملتونو عالي کمېشنري زیاته کړې چې د روان کال د اپرېل له لومړۍ تر ۳۰مې نېټې څه باندې ۲۸۲ زره افغانان خپل هېواد ته راستانه شوي او له دې ډلې شاوخوا ۱۰۷۶۰۰ کسان په جبري توګه اخراج شوي دي.</p>
<p style="text-align: justify;">دا په داسې حال کې ده چې د کډوالو او راستنېدونکو چارو وزارت د زمري په ۸مه ویلي وو چې یوازې په تېرو درېیو میاشتو کې نږدې دوه میلیون کسان له ایران او پاکستانه افغانستان ته راستانه شوي چې له دې ډلې ۸/۱ میلیون کسان په جبري توګه له ایرانه ایستل شوي دي.</p>
<p style="text-align: justify;">د ایران د بهرنیو چارو وزیر له مخکې ویلي وو چې اوسمهال په دغه هېواد کې څه باندې شپږ میلیون افغانان شتون لري او پرېکړه یې کړې چې د روان کال تر پایه به له دوی دوه میلیون کسان اخراج کړي.</p>
