ختیځ زون کې د پولیو واکسین د کمپاین پيل؛ له پنځو کلونو کم‌عمره نږدې ۱،۵ میلیون ماشومان واکسین کېږي

<p style="text-align: justify;">کابل (پژواک، ۸ وږی ۱۴۰۴): د عامې روغتیا وزارت اعلان کړی چې د هېواد د ختیځ زون په څلورو ولایتونو کې د ماشومانو د ګوزڼ (پولیو) واکسین کمپاین پیل شوی دی.</p>

<p style="text-align: justify;">د عامې روغتیا وزارت ویاند شرافت زمان د یوې خبرپاڼې په خپرولو ویلي، یاد کمپاین په درېیو پړاوونو کې پلی کېږي چې موخه یې د پولیو ویروس له خطره له پنځو کلونو د کم‌عمره ماشومانو خوندیتوب دی.</p>

<p style="text-align: justify;">په خبرپاڼه کې راغلي، لومړی پړاو د ۲۰۲۵ کال د اګسټ له ۳۰مې د سپټمبر تر ۵مې د ننګرهار په مرکز، بهسودو، بټي‌کوټ، سره‌رود او خوګیاڼو ولسوالیو، دغه‌راز د لغمان په مرکز مهترلام او د کونړ ولایت په مرکز اسعداباد کې او دویم پړاو د سپټمبر له ۲۷مې د اکټوبر تر ۳مې د ختیځ زون په ۲۰ ولسوالیو کې او درېیم پړاو د اکټوبر له ۱۸مې تر ۲۴مې د ختیځ زون په ۲۳ ولسوالیو کې پلی کېږي.</p>

<p style="text-align: justify;">سرچینې زیاته کړې، ټاکل شوې په یاد کمپاین کې له پنځو کلونو کم عمره نږدې ۱،۴ میلیون ماشومان واکسین شي.</p>

<p style="text-align: justify;">دغه‌راز په خبرپاڼه کې راغلي چې د پولیو زرقي جزیي واکسین (fIPV)  د ۴ تر ۵۹ میاشتنیو ماشومانو لپاره له ستنې پرته د یوې عصري وسیلې له لارې تر پوستکي لاندې تطبیقېږي او د پولیو څاڅکي واکسین (OPV)  ماشومانو ته له زېږون تر پنځه کلنۍ په خوراکي ډول د خولې له لارې ورکول کېږي.</p>

<p style="text-align: justify;">سرچینه وايي چې د پولیو زرقي جزيي واکسین (fIPV) د ماشومانو د معافیت سیسټم په لوړولو او د پولیو ویروس د خپرېدو خطر په کمېدو کې مهم رول لري او د هغو ماشومانو معافیت چې پخوا یې د پولیو څاڅکي واکسین (OPV) ترلاسه کړی، لا پياوړی کوي.</p>

<p style="text-align: justify;">خبرپاڼه کې د عامې روغتیا وزیر مولوي نورجلال جلالي له قوله ویل شوي: «د عامې روغتیا وزارت ژمن دی چې د افغانستان له هر ماشومه د پولیو ناروغۍ د خطر پر وړاندې ساتنه وکړي؛ په یاد کمپاین کې غواړو ډاډ ترلاسه کړو چې ماشومان د هېواد په ختیځو سیمو کې دواړه واکسینونه زرقي او خوراکي ترلاسه کوي، څو د وجود د معافیت سیسټم یې پياوړی شي او له پولیو د یوه پاک افغانستان پر لور یو بل ګام هم نږدې شو.»</p>

<p style="text-align: justify;">هغه زیاته کړې چې د پولیو پر وړاندې مبارزه کې د ټولنې د ټولو غړو همکاري مهمه او حیاتي ده؛ میندې، پلرونه او د کورنۍ نور غړي کولای شي د کمپاین پر مهال د خپلو ماشومانو په واکسین کولو هغوی له دایمي ګوزڼ څخه وساتي، ځايي مشران کولای شي خلک وهڅوي څو خپل ماشومان واکسین کړي او د واکسین له ټیمونو ملاتړ وکړي.</p>