د افغانستان د فوټسال ملي لوبډله نن له میانمار سره لوبه کوي

<p style="text-align: justify;">کابل (پژواک، ۲ تله ۱۴۰۴): د افغانستان د فوټسال ملي لوبډله د ۲۰۲۶ کال د اسیا ملتونو جام په مقدماتي سیالیو کې نن د میانمار د فوټسال لوبډلې پر وړاندې سیالي کوي.</p>

<p style="text-align: justify;">د افغانستان د فوټسال ملي لوبډله نن (چهارشنبه) ماسپښن ۲:۰۰ بجې د میانمار له لوبډلې سره سیالي کوي.</p>

<p style="text-align: justify;">د ۲۰۲۶ کال د اسیا فوټسال جام د غوراوي پړاو په H ګروپ کې د هېواد د فوټسال لوبغاړو وروستۍ لوبه د میانمار په یانګون لوبغالي کې ترسره کېږي.</p>

<p style="text-align: justify;">په همدې حال کې، د افغانستان فوټبال فدراسیون په یوه <strong><a href="https://www.facebook.com/permalink.php?story_fbid=pfbid026ua9xYamGNJVvqZ5S8s41yYzZL5n5WiLefstQf6YtHQ2Dpw89Pq96ATbWmoLbxEil&id=61571891885845">خبرپاڼه</a> </strong>کې ویلي چې د میانمار پر وړاندې له لوبې مخکې د فوټسال ملي ټیم د ​​لوبغاړو تاکتیکي غونډه تېره شپه د یانګون ښار په یوه هوټل کې وشوه.</p>

<p style="text-align: justify;">د خبرپانې له مخې، د هیواد د فوټسال ملي ټیم ​ روزونکي مجید مرتضایي خپلو لوبغاړو ته د مقابل ټیم د قوت او کمزورتیا ټکې په ګوته کړل.</p>

<p style="text-align: justify;">د یادونې ده چې د هېواد د فوټسال ملي لوبډلې خپله وروستۍ لوبه د مالدیپ د فوټسال ملي لوبډلې پر وړاندې ۱۰ پر یو ګټلې وه.</p>