کابل (پژواک، ۳۰ وری ۱۴۰۵): د اوکراین په پلازمېنه کيیف کې د یوه وسلهوال کس له خوا د ډزو له امله شپږ کسان وژل شوي او ۱۴ نور ټپیان شوي دي.
رویټرز راپور ورکړی چې دغه وسلهوال کس پرون د یوه پلورنځي دروازې ته نږدې پر لارویانو ډزې کړې دي.
په راپور کې راغلي چې پولیسو له شاوخوا ۴۰ دقیقو هڅو وروسته بریدګر له منځه وړی دی.
د اوکراین ولسمشر ولودیمیر زلنسکي ویلي چې دا پېښه په هولوسیفسکي سیمه کې شوې ده.
د اوکراین امنیتي ادارې دغه پېښه «ترهګریز عمل» بللې او ویلي یې دي چې تر اوسه د برید انګېزه نه ده معلومه.
د اوکراین د کورنیو چارو وزیر ویلي چې بریدګر ثبتشوې وسله درلوده او پرته له خبرداري یې پر خلکو ډزې کړې دي. د څارنوالۍ په خبره، دغه کس د مسکو زېږېدلی و او مخکې یې د اوکراین په ختیځ کې ژوند کاوه.
چارواکو ټینګار کړی چې د دې پېښې د انګېزې روښانه کولو لپاره څېړنې روانې دي او د بریدګر ټولې اړیکې او برېښنايي وسایل تر څېړنې لاندې دي.
