<p style="text-align: justify;">جلالاباد (پژواک، ۸ وری ۱۴۰۳): د ننګرهار مرکز جلالاباد ښار اوسېدونکي او ښار ته له ولسواليو راغلي خلک وايي چې د اختر په نږدې کېدو سره د رختونو او جامو ګنډلو نرخونه لوړ شوي دي.</p>
<p style="text-align: justify;">هغوی له ښاروالۍ غوښتنه کوي چې بايد نرخونه کنټرول کړي او داسې نرخونه وټاکل شي چې د هېواد روان اقتصادي وضعيت سره برابر وي.</p>
<p style="text-align: justify;">خو د جلالاباد ښاروالۍ مسوولين وايي، تر ډېره يې نرخونه کنټرول کړي او هره ورځ د رختونو او جامو ګنډونکو په ګډون له ټولو صنفونو څخه د نرخونو د کنټرول په موخه نظارت کېږي.</p>
<p style="text-align: justify;">زرمحمد چې د بهسودو ولسوالۍ اوسېدونکی دی او د جلالاباد ښار بزازۍ کوڅې ته د اختر لپاره خپلو ماشومانو ته د رخت اخیستو په موخه راغلی، وايي، د رختونو نرخونه لوړ شوي دي.</p>
<p style="text-align: justify;">دی وايي: «مخکې به چې کومه جوړه په شپږ سوه کېده اوس هغه په اووه نيم او ۸۰۰ افغانيو خرڅېږي، اقتصادي مشکلات ډېر زيات دي، خلک د دې توان نه لري، بايد اوسني اقتصاد سره سم نرخونه وټاکل شي.»</p>
<p style="text-align: justify;">اباسين چې د جلالاباد ښار د اوومې ناحیې اوسېدونکی دی، وايي چې له خپلو ملګرو سره يو ځای د جامو ګنډلو او رخت اخیستو په موخه تللی چې د دواړو بيو کې لوړوالی راغلی دی.</p>
<p style="text-align: justify;">هغه پژواک ته وويل: «موږ رخت اخیسته، څو دوکانونه مو ولټول، خو نرخونه د ټولو لوړ وو، بيا مو چې رخت واخیست، خياطانو هم نرخونه لوړ کړي، په داسې حال کې چې ښاروالۍ ۳۵۰ افغانۍ ورته ټاکلي دوی څلور څلور نيم سوه افغانۍ غوښتلې.»</p>
<p style="text-align: justify;">دغه راز په جلالاباد ښار کې یوه مدني فعال خانزاده افغان له ښاروالۍ غوښتنه وکړه چې د هېواد روان خراب اقتصادي حالت ته په کتو بايد نرخونه کنټرول شي.</p>
<p style="text-align: justify;">دی وايي، ډېر خلک توان نه لري چې په اوسنيو نرخونو کې خپلو اولادونو ته د اختر لپاره نوې جامې جوړې کړي.</p>
<p style="text-align: justify;">بلخوا، د جلالاباد ښار د بزازانو اتحاديه وايي چې د رختونو نرخونه کنټرول شوي او په وړ بيه خرڅېږي.</p>
<p style="text-align: justify;">د جلالاباد ښار د بزازانو اتحاديې مشر ګلولي شاه وايي: «موږ هره ورځ رخت پلورونکو سره ناستې کوو، نرخونه پرې ټيټوو، خو کله چې يو څوک رخت واخلي او بيا يې خياط ته وړي نو هغه ترې ډېرې پیسې اخلي.»</p>
<img class="aligncenter wp-image-604980 " src="https://pajhwok.com/wp-content/uploads/2024/03/تکه-رخت-1.jpg" alt="" width="666" height="419" />
<p style="text-align: justify;">خو بل لور ته جلالاباد ښار کې یوه خیاط اولخان پژواک ته وويل: «ټول خياطان نرخونه نه لوړوي، اوس وخت کې کار ډېرېږي، کاریګر هم پيسې ډېرې غواړي، بل خلک ډیزاینونه فرمايش ورکوي، نو د فرمايشي جامو خو بیا پيسې ډېرې کېږي.»</p>
<p style="text-align: justify;">خو د جلالاباد ښاروالۍ وياند بختي جان مراد بيا وايي چې نرخونه تر ډېره کنټرول شوي دي.</p>
<p style="text-align: justify;">هغه وايي، هره ورځ د ښاروالۍ د پلټنې ډلې د ښار بېلابېلو برخو کې په بېلابېلو صنفونو ګرځي، نرخونه يې کنټرولوي او له سرغړونکو سره به نو قانوني چلند کېږي.</p>
<p style="text-align: justify;">مراد له خلکو وغوښتل چې د دغه ډول سرغړونو پرمهال ښاروالۍ سره په اړيکه کې شي چې د سرغړونکو مخه ونيول شي.</p>
<p style="text-align: justify;">دا په داسې حال کې ده چې همدا نن د پژواک په یوه بل راپور کې د خوست خلکو بیا د خوراکي توکو د نرخونو له لوړوالي شکایتونه کړي دي.</p>
