<p style="text-align: justify;">کابل (پژواک، ۲۶ غبرګولی ۱۴۰۴): د کور او ښار جوړولو وزارت وایي چې افغان نړۍوال اسلامي پوهنتون ته د هغه د پراختیا په موخه په نوي کابل ښار کې ۱۰۰۰ جریبه ځمکه ورکول کېږي.</p>
<p style="text-align: justify;">د کور او ښار جوړولو وزارت نن په یوه خبرپاڼه کې ویلي، د دغه وزارت د سرپرست وزیر شیخ حمدالله نعماني په مشرۍ د لوړو زدهکړو، کرنې، اوبو لګولو او مالدارۍ، مالیې، اطلاعات او فرهنګ، د اوبو او انرژۍ وزارتونو او چاپېریال ساتنې ملي ادارې له استازو څخه د تشکیل شوې کمیټې غونډه ترسره شوه.</p>
<p style="text-align: justify;">خبرپاڼه کې زیاته شوې، دغه ناسته د اسلامي امارت د مشرتابه د حکم د عملي کولو په موخه ترسره شوې چې د کابل په نوي ښار کې افغان نړۍوال اسلامي پوهنتون ته د هغه د پراختیا په موخه ۱۰۰۰ جریبه ځمکه ورکړل شي.</p>
<p style="text-align: justify;">د کور او ښار جوړولو وزارت سرپرست ویلي: «د عالیقدر امیرالمؤمنین حفظه الله د حکم د تعمیل او د اسلامي نسل د سالمې روزنې او ښې راتلونکې په پار لازمه ده چې د نوي کابل ښار تر چتر لاندې ځمکو کې افغان نړۍوال اسلامي پوهنتون ته د پراختیا په موخه یاده ځمکه ورکړل شي.»</p>
<p style="text-align: justify;">سرچینې لیکلي، په دې ناسته کې هوکړه شوې چې که ټوله ځمکه په یو ځای کې نه وي نو په څو ځایونو کې دې ورته ورکړل شي.</p>
<p style="text-align: justify;">د کور او ښار جوړولو وزارت د معلوماتو له مخې، په نوي کابل ښار کې به د افغان نړۍوال اسلامي پوهنتون د بېلابېلو پوهنځیو لپاره ودانۍ، لابراتوارونه، تحقیقاتي مرکزونه، کتابتونونه، د استادانو لپاره کورونه، د محصلینو لپاره لیلیه، کنفرانس خونه، مېلمستون، لوبغالي، د خدماتو او ترانسپورټ مناسب ځایونه، شنې ساحې، د اوبو ذخیرې او نور اړین ځایونه جوړ شي.</p>
