<p style="text-align: justify;">کابل (پژواک، ۵ لړم ۱۴۰۳): تېره اونۍ «برېکس» د خپلواک، سولهییز او له ترهګرۍ، جګړې او نشهيي توکو د خوندي افغانستان ملاتړ وکړ، م.م په افغانستان کې د ښځو له حقونو د ملاتړ پر پراختیا ټینګار وکړ، غور کې د داعش د دوو کسانو د وژلو خبر ورکړل شو او اروپايي ټولنې د افغانستان د روغتيا له سکټور سره د مرستې لپاره ۳۱ میلیونه یورو ځانګړي کړل.</p>
<p style="text-align: justify;"><strong>د تېرې اونۍ مهم خبرونه:</strong></p>
<ul style="text-align: justify;">
<li>د برېکس غړي هېوادونه: د خپلواک، سولهییز او له ترهګرۍ، جګړې او نشهيي توکو د خوندي افغانستان ملاتړ کوو</li>
<li>د برېکس په سرمشریزه کې ازبکستان او قرغيزستان له نړۍوالې انزوا د افغانستان پر ایستلو ټینګار وکړ</li>
<li>ډېکسن: لندن هڅه کوي د کابل او غربي نړۍ ترمنځ د اړیکو جوړولو ته لار هواره کړي</li>
<li>کابل کې د ازبکستان د دیني عالمانو پلاوی: د دواړو هېوادونو ترمنځ د اړیکو پیاوړتیا لپاره هڅه کوو</li>
<li>د سوداګرۍ او صنع وزارت: افغانستان غواړي له قزاقستان سره سوداګري درې میلیارده ډالرو ته لوړه کړي</li>
<li>م.م: په افغانستان کې باید له ښځو ملاتړ پیاوړی کړو</li>
<li>مجاهد: غور کې د داعش دوه کسان وژل شوي او ځیني ژوندي نیول شوي</li>
<li>اروپايي ټولنې د افغانستان له روغتيايي سکټور سره د مرستې لپاره ۳۱ میلیونه یورو ځانګړي کړي</li>
</ul>
<p style="text-align: justify;"><strong>مرګژوبله</strong><strong>:</strong></p>
<p style="text-align: justify;">تېره اونۍ په افغانستان کې په بېلابېلو پېښو کې اووه کسان وژل شوي او ۱۴ نور ټپیان وو.</p>
<p style="text-align: justify;">تېره اونۍ د کابل امنیې قوماندانۍ ویاند خالد ځدراڼ ویلي وو، د کابل پامیر سینما سیمه کې د چاودنې، د چاودېدونکو توکو لېږدوونکی کس – چې له امله یې یوولس تنه ټپیان او یو ماشوم وژل شوی – په ټپي حالت کې نیول شوی دی.</p>
<p style="text-align: justify;">دغه راز، د اسلامي امارت ویاند ذبيحالله مجاهد ویلي چې امنیتي ځواکونو په غور کې د داعش ډلې پر یوه پټنځای عملیات ترسره کړي چې په پایله کې یې دوه کسان وژل شوي او ځیني یې ژوندي نیول شوي دي.</p>
<p style="text-align: justify;">ځايي چارواکي وايي، په غزني کې له پخوا پاتې د یو لاسيبم چاودنه کې درېیو ماشومانو ژوند بایللی او د یوه ماشوم په ګډون درې کسان ټپیان دي او نورستان کې د دوو کورنيو ترمنځ شخړه کې يو کس وژل شوی دی.</p>
<p style="text-align: center;"><img class="aligncenter wp-image-646732 size-full" src="https://pajhwok.com/wp-content/uploads/2024/10/P-3.jpg" alt="" width="621" height="550" /></p>
<p style="text-align: justify;">یادونه: د مرګژوبلې یادې شمېرې پژواک ته د رسېدلو راپورونو له مخې ښودل شوې، خو کېدای شي د ځینو پېښو په اړه یې راپورونه نه وي ترلاسه کړي او یا سرچینو د مرګژوبلې کره شمېرې نه وي ښودلې.</p>
<p style="text-align: justify;">وړمه اونۍ په افغانستان کې په یوه پېښه کې پنځه کسان وژل شوي او پنځه نور ټپیان وو.</p>
<p style="text-align: center;"><iframe src="https://docs.google.com/spreadsheets/d/e/2PACX-1vQrTjuyNsKyyMZnlDv_xzrJRjYp1kJDScMBBIgtCh-7TT0t1H8r6MlN-YhHroFjA0ROdT77cfT-I5OG/pubchart?oid=586131103&format=interactive" width="600" height="371" frameborder="0" scrolling="no" seamless=""></iframe></p>
<p style="text-align: justify;">دا په داسې حال کې ده چې په هېواد کې د ۱۴۰۰ کال د زمري میاشتې له بدلون مخکې د جنایي پېښو ترڅنګ په جګړو کې هره اونۍ سلګونو ملکي وګړو او د ښکېلو غاړو کسانو ته مرګژوبله اوښته.</p>
<p style="text-align: justify;"><strong>د برېکس ناسته</strong></p>
<p style="text-align: justify;">تېره اونۍ، د برېکس درې ورځنۍ سرمشریزه د ۳۶ هېوادونو د مشرانو او یو شمېر نړۍوالو سازمانونو د استازو په ګډون د روسیې د تاتارستان په مرکز کازان ښار کې ترسره شوه.</p>
<p style="text-align: justify;">د راپورونو له مخې، د برېکس غړو هېوادونو مشرانو په یوه ګډه <a href="https://tolonews.com/index.php/pa/afghanistan-191337">اعلامیه</a> کې ټینګار کړی چې د یو خپلواک، ملګري، سولهییز او له ترهګرۍ، جګړې او نشهيي توکو د خوندي افغانستان ملاتړ کوي.</p>
<p style="text-align: justify;">دغه راز، د دې اعلامیې په یوه برخه کې افغانانو ته د بېړنیو بشري مرستو رسولو پر اړتیا او د نجونو پر مخ د زدهکړو د محدودیتونو پر لرې کېدو د ټینګار ترڅنګ د افغانستان د مسایلو په حل کې د سیمې او ګاونډیو هېوادونو رول مهم بلل شوی دی.</p>
<p style="text-align: justify;">د اسلامي امارت د ویاند مرستیال حمدالله فطرت ویلي چې افغانستان د برېکس سرمشریزې په اجنډا او محور کې ځای لري، اسلامي امارت د سیمې د هېوادونو پام دې ته راګرځوي چې د افغانستان ټيکاو او اقتصاد په سیمهییزه کچه ځانګړی ارزښت لري او د ټولو په ګټه دی.</p>
<p style="text-align: justify;">د راپورونو له مخې، په دې غونډه کې د ازبکستان ولسمشر شوکت میرضیایوف له نړۍوالې انزوا د افغانستان پر ایستلو <a href="https://tolonews.com/index.php/pa/afghanistan-191351">ټینګار</a> کړی او بشري مرستې، د اقتصاد ښه کېدل او په افغانستان کې د سولې او ټیکاو رامنځته کېدل یې مهم بللي دي.</p>
<p style="text-align: justify;">د قرغیزستان ولسمشر صدر جباروف هم په دې غونډه کې له افغانستانه هر اړخیز ملاتړ او د اقتصاد له نړۍوالو او سیمهییزو اقتصادي سیسټمونو سره د دغه هېواد یوځای کېدل مهم بللي او له افغانستان سره د بهرنیو مرستو پر دوام او له نړۍوالې انزوا د افغانستان پر ایستلو یې ټينګار کړی دی.</p>
<p style="text-align: justify;">د ایران ولسمشر مسعود پزشکیان د هند له لومړي وزیر نریندرا مودي سره کتنه کې <a href="https://pajhwok.com/ps/2024/10/23/doctors-iran-supports-peace-and-stability-in-afghanistan/">ویلي</a>، ایران د هر هغه اقدام ملاتړ کوي چې په افغانستان کې د سولې او ارامۍ په ټینګښت کې مرسته کوي.</p>
<p style="text-align: justify;"><strong>د ا.ا او غربي نړۍ ترمنځ د اړیکو جوړېدو هڅې او افغانستان ته د ازبکستان علماوو سفر</strong></p>
<p style="text-align: justify;">تېره اونۍ، د افغانستان لپاره د بریټانیا سفارت شارژدافير رابرټ ډېکسن د افغانستان ریاستالوزراء له سیاسي مرستیال مولوي عبدالکبیر سره لیدنه کې <a href="https://pajhwok.com/ps/2024/10/25/dixon-london-is-trying-to-facilitate-the-establishment-of-relations-between-the-eu-and-the-western-world/">ویلي</a>، لندن له اسلامي امارت سره د خبرو د دوام پلوی دی او د بریټانیا حکومت په خپل هېواد کې د افغانستان سرپرست حکومت مخالفینو ته د فعالیت اجازه نه ورکوي.</p>
<p style="text-align: justify;">هغه په راتلونکي کې د ځينو اړینو مسایلو په اړه د دوه اړخیزو ناستو جوړېدو وړاندیز کړی او ویلي یې دي چې لندن هڅه کوي د کابل او غربي نړۍ ترمنځ د اړیکو جوړېدو ته لار هواره کړي.</p>
<p style="text-align: justify;">تېره اونۍ، کابل ته د ازبکستان د دیني عالمانو يو پلاوي راغلی و؛ د یاد پلاوي مشر شیخ مفتي نورالدین خالق نظر له افغان چارواکو سره په لیدنه کې <a href="https://pajhwok.com/ps/2024/10/24/the-visit-of-uzbek-scholars-to-afghanistan-has-been-considered-valuable-opportunities-for-the-strengthening-joint-values/">ویلي</a>، د یاد هېواد د علماوو او چارواکو راتګ له افغانستان سره د ښه ګاونډیتوب، ګډو متقابلو ګټو، تعامل او همکاریو ښکارندویي کوي.</p>
<p style="text-align: justify;">د یو بل خبر له مخې، ایټالیا سبرینا اوګولیني د افغانستان لپاره د دغه هېواد د نوې سفیرې په توګه <a href="https://pajhwok.com/ps/2024/10/26/sabrina-ogolini-has-been-appointed-as-the-new-italian-ambassador-to-afghanistan/">ګومارلې</a> چې د قطر له پلازمېنې دوحې ښاره به فعالیت کوي.</p>
<p style="text-align: justify;"><strong>د ښځو حقونه</strong></p>
<p style="text-align: justify;">د ملګرو ملتونو د سرمشني مرستیالې امینې محمد د دغه سازمان د امنیت شورا په غونډه کې <a href="https://tolonews.com/index.php/pa/afghanistan-191353">ویلي</a>، په افغانستان کې باید د ښځو له حقونو د ملاتړ کچه پراخه شي.</p>
<p style="text-align: justify;">د برېکس د سرمشرې په ګډه اعلامیه کې هم افغانانو ته د بېړنیو بشري مرستو رسولو پر اړتیا او د نجونو پر زدهکړو د محدودیتونو پر لرې کېدو ټینګار شوی.</p>
<p style="text-align: justify;">دغه راز، په کابل کې د ملګرو ملتونو د سرمنشي ځانګړې استازې روزا اوتونبایوا په کابل کې يوې ناسته کې ویلي، په افغانستان کې د ډېرو کسانو، په ځانګړي ډول د ښځو اساسي حقونه له محدویتونو سره مخ دي.</p>
<p style="text-align: justify;">خو د افغانستان د امر بالمعروف، نهي عنالمنکر او د شکایتونو اورېدو وزارت سرپرست شیخ محمدخالد <a href="https://pajhwok.com/ps/2024/10/23/hanafi-womens-rights-are-given-to-women/">ویلي،</a> اسلامي امارت د ښځو شرعي حقونو ورکولو ته ژمن دی، هيڅوک حق نه لري ښځې په بدو کې ورکړي او یا یې پر نورو شرعي حقونو سترګې پټې کړي.</p>
<p style="text-align: justify;">هغه <a href="https://pajhwok.com/ps/2024/10/21/hanafi-no-one-has-the-right-to-marry-women-2/">ویلي</a>، هڅه کوي چې ښځو ته د اسلام مبارک دین کې ورکړل شوي ټول حقونه ورسېږي.</p>
<p style="text-align: justify;"><strong>بشري مرستې</strong></p>
<p style="text-align: justify;">اورپايي ټولنې په افغانستان کې له روغتيايي سکټور سره د مرستې لپاره ۳۱ میلیونه یورو ځانګړي کړي دي.</p>
