سوداګري او اقتصاد

د هېواد د اقتصاد وزیر په افغانستان کې د ملګرو ملتونو د ادارو له استازو سره په یوه ناسته کې د نړۍوالې ټولنې د بشري مرستو د دوام او په ختیځ کې د وروستۍ زلزلې له زیانمنو سره د بېړنیو مرستو د چټکولو غوښتنه کړې ده.

په کابل کې یو شمېر هغه ښځې چې د مرخېړیو د تولید فارمونه لري وايي، د دې لپاره چې دغه کاروبار یې وده وکړي، سړې خونې دې ورته جوړې شي.

د پنجشېر ولایت د مطبوعاتو دفتر وايي چې د دغه ولایت ۶ زره او ۴۸۵ قیراطه زمرد د ازادې داوطلبۍ له لارې د ۱۰۷ زره او ۵۵۹ امریکايي ډالرو په ارزښت وپلورل شول.

د کندهار د کرنې، اوبولګولو او مالدارۍ ریاست وایي، سږ کال په دغه ولایت کې د انګورو حاصلات ۲۰۵ زره ټنه اټکل شوي چې د هغو نیمایي پر ممیزو بدلېږي، بلخوا سوداګر بیا له حکومت او سوداګرۍ خونې غوښتنه کوي چې دغو ممیزو ته نړۍوال بازار پیدا کړي.

د صنعت او سوداګرۍ وزارت وايي، له دې وروسته د تېلو، ګاز او نورو نفتي توکو واردات يوازې د نافذه نورمونو او سټنډرډونو پر بنسټ جواز لري او هغه سوداګر چې سرغړونه کوي، له جدي قانوني چلند سره به مخ شي.

نن په کابل ښار کې د تېرو اوو ورځو په نسبت د اوړو، غوړیو، بورې او سروزرو بیې لوړې شوې خو د نورو لومړنیو توکو بیو کې بدلون نه دی راغلی.

د اوړي په ګرمو شپو ورځو کې په داسې حال کې چې ډېری کورنۍ او هټۍوال په فابریکو کې له تولید شوي یخي استفاده کوي خو د دغه یخي د کیفیت او خوندیتوب په اړه ځینې اندېښنې هم شتون لري؛ مسوولین وايي، په کابل کې د یخي د تولید په ډېرو فابریکو کې له زنګ وهلو قالبونو او غیرمعیاري وسایلو کار اخیستل کېږي.

په کندهار کې د لبنیاتو د پروسس فابریکو مسوولین وايي، په دغه ولایت کې هره ورځ له مالدارانو لسګونه زره لېتره شیدې راټولوي خو د دې لپاره چې د مالدارانو د محصولاتو ارزښت لا ډېر شي، پر وچو وارداتي شیدو دې تعرفه لوړه شي.

فراه کې د دغه ولایت د کرنې ریاست په مرسته او د یوې موسسې په  ملاتړ د «عنابو او شاتو» دوه ورځنی نندارتون پرانیستل شو.

نن په کابل ښار کې د تېرو اوو ورځو په نسبت د ځینو خوراکي توکو بیې یو څه لوېدلې خو د سرو زرو بیې لوړې شوې دي.

د ریاست‌الوزراء اقتصادي مرستیال کابل ښار ته د پنجشېر له سینده د اوبو د لېږد په اړه له یوه خصوصي شرکت سره ناسته کړې او ویلي یې دي چې د دغه ښار د اوبو ستونزې هواري لپاره جدي هڅې کوي.

د لوګر د کانونو او پټرولیم ریاست مسوولین وايي، د دغه ولایت په محمداغه ولسوالۍ کې د یوه خصوصي شرکت له‌خوا د ۱۴ میلیون افغانیو په پانګونې د کرومایټ ډبرو د پروسس یوه کارخونه جوړه شوه.